السلام عليكم .. قوه يابنياتي الحلوات شلونكم .. وشخباركم عساكم بعافيه .. ايي يابنات اليوم بنسوي مرقة الشبزي .. شحلاتها وشحلات ريحتها الخنينة .. طريقتها سهله وبسيطه مايبلها اي تعقيد بس فتحوا مخوخكم ال... و راح تفهمون كل شي وتستوعبون .. ادري المخ مييييييح لكن شسوي امري لله .. طريقة مرقة الشبزي نفس مرقة اللحم بالضبط مع بعض التغيريات وبعض الاضافات .. ويالله خلونا نبدي
بسم الله بدينا وعلى النبي صلينا .. نحتاج حق طبختنا .. 7 شدات كزبر .. 5 شبنت .. 5 كرفس .. 5 سلق .. شدتين بقل .. 3 بقدونس .. نص كيلو لحم مقطع .. 5 فصوص ثوم .. 3 بصلات ولميات .. حبتين طماط .. وطبعا بهار وملح
اول شي نفرم الخضره كلها ونخلطها مع بعض ونخليها على كتر .. وبعدين نقص البصل والطماط وندق الثوم .. وقبل كل هذا نكون غاسلين اللحم زين مفهوووووووووم مغسوووووول عدل .. الحين نبدي طبختنا
ناخذ جدر ونحط فيه شوية دهن وفوقه البصل والطماط والبهار .. ونحمسهم وبعدين نحط الثوم وفوقه اللحم .. ونخلي اللحم يتعرق بالجدر يعني ينز الماي اللي فيه وبعدها بشوي نحط نص كمية الخضار ونحمسهم مع بعض .. وبعدين نحط ماي فوق اللحم ونخليه يطبخ .. وهني عاد على حسب نوع اللحم اذا كان طلي صغير ماياخذ وقت واذا كان خروف هرم راح يطول شوي .. يعني انتوا شوفوا اللحم شلون يصير وقبل لا يستوي اللحم عدل .. نحط باجي الخضره ونخلي الجدر يقلب على نار هاديه .. وسلامتكم وعليكم بالعافيه
طبعا لاتنسون تحطون لومي سحاري تخرمونه وتقطونه بالجدر .. وتقدرون تحطون شوية معجون طماط ..وفي ناس تحب تحط لوبه مع الشبزي هم حلوه بس اللوبه لازم تنقع ساعتين عشان تنضي بسرعه .. وهم تقدرون تحطون بطاط . يعني على هواكم .. وبالنسبه للملح لاتكثرون منه مع البهار لان الخضره فيها املاح يعني حطوا شوية وشوفوا اذا تحتاج المرقه اكثر زيدوا
طبعا اكلتنا هذي تسونها مع مشخول ولا تنسون الفرقاعه .. والمعبووج
__________________________________________________ _
هلا والله في بنياتي الحلوات شلونكم ؟؟ عساكم بخير .. اليوم بعلمكم طبخه يسمونها قبل طبخة الزراط لانها تنزرط .. وتعتبر هل طبخه غرام العيايز والشياب .. وهي يريش لقيمي و نحتاج حق طبختها جيلتين يريش .. كيلو او نص كيلو لحم ويفضل تكون اللحمه من صوب الظلوع .. ونبي بعد حروة الكيلو طماط مقصوص كبار او شرايح كبيره.. ونبي 3 قواطي معجون و5 فصوص ثوم و6 بصلات وبهارات .. وهي .. لومي اسود وفلفل اسود و كركم وهيل ناعم ومسمار وكمون ودارسين وهذا كله ناعم .. واحسن شي تسونه تدقون البهارات بوقتها عشان تصير طازجه وريحتها خنينه .. الحين نبدي
بسم الله بدينا وعلى النبي صلينا .. نقص البصل صغار ناخذ نص الكميه حق الحشو والباجي للطبخ والحشو ترى سهل البصل المفروم نحط عليه لومي اسود وفلفل اسود وبس من غير طباخ يعني بصل طري ..
ماعلينا نكمل .. نيييب الجدر ونحط عليه دهن شوي ونحمس البصل مع شويه من الطماط والبهارات وبعدين نحط الثوم ونحمسه ونحط المعجون ونحمس لمدة 5 دقايق وبعدين نحط باجي الطماط واللحم ونحمس شوي شوي ونصب فوق الحميس ماي ونخليه يقلب لمدة ساعه تقريبا وبعدها نكون مغسلين اليريش ومنقعينه شوي .. الحين نحط اول شي الملح و نييب لومي سحاري حبتين ونقضهم ونحطهم بالجدر وبعدين اخر شي نحط اليريش بالجدر ونحركه شوي شوي ونخليه يخلط مع اللحم وبعدين نسكر الجدر عدل ونحط فوقه الهاون او اي شي عشان يصير محكوم وبعدين نقصر على النار ونخليه يستوى على نار هاديه لمدة ساعتين ونص الى ثلاث ساعات وبعدها عاد ياكم وقت الضراب .. تيبييين المضرا ب وحيل تكفخين بالجدر ولما يصير يعني مقبول يعني لايصير ناعم وايد لان اليرييش حلاته شوي محبب وبعدين تنجبين ولا تنسين تحطين الحشو ودهن العداني
وعليكم بالعافيه
لاتنسون تكثرون من المعبوج ودقوس القراش وخصوصا المعبوج الاحمر بوتيله والخضره
--------------------------------------------------------------------------------------------
طبختنا محمر مع مرقة شعوم .. طبعا السمجه اختيارها يكون على كيفكم تبون بالول ولا زبيدي ولا اي شي ثاني على هواكم .. سلمكم الله وحفظكم المحمر نوعين نوع على دبس وهذا اول نسويه والنوع الثاني يصير على شكر عادي .. الدبس نخليه على كتر لان مافي احد يستخدمه هل ايام .. وبنسوي محمرنا على شكر وهم الشكر له طريقتين الاولى تحرقين الشكر بالجدر وهذي شوي صعبه عليكم فبعطيكم الطريقه السهله .. ويالله نبدي
بسم الله بدينا وعلى النبدي صلينا .. طبعا ماراح اقول طريقة المرق لان قلناها من قبل واهم شي تكون خاثره ... وطريقة المحمر سلمكم الله نحتاج جيلتين عيش مغسول وطريقته مثل طريقة المشخول بالضبط بس بدال لانحط ملح نحط شكر .. يعني نحط ماي في الجدر وننطر لما يبدي يفوح نحط قلاص شكر بالماي ونخليه يذوب وبعدها نحط العيش ونخليه يقلب على نار هاديه طبعا وبعدها لما يبدي ينضي نشخله بالمشخال .. لكن هني نبدي نحط شكر اكثر شلون؟؟ انا اقولكم شلون
تحاولين تزلين الماي من العيش شوي شوي ومن تصير طبقه من العيش بالمشخال حطي قفشة شكر نثريها فوقه وبعدها حطي طبقه ثانيه ونفس الشي لما تخلصين .. بعدين بنفس الجدر حطي نتيفة دهن وكتي العيش بالجدر وفوقه حطي زعفران منقع بماي الورد ونطري عليه لما يتسكر وعليكم بالعافيه
هذي طرقه مختصره عن المحمر وترى سهله ومافيها صعوبه .. والشكر تقدرون تزيدونه على كيفكم واذا حطيتوا العيش ذوقي شوي منه وشوفي قياس الشكر فيه اذا قاصر هني تعالجينه مع الزعفران يعني تحطين بماي الزعفران شكر وتذوبينه وترشينه على العيش وانا افضل دايم تحطين شكر مع ماي الزعفران
__________________________________________________ _